Panthers milubong sa ScorpionS

CEBU, Philippines - Gilubong buhi sa Pink Panthers ang Red Scorpions, 64-43 aron moiskor sa labing una nilang daog sa   2015 Cebu People’s Coop Sportsfest basketball event   didto sa San Nicolas gym,  siyudad sa Sugbo.

Sikit pa ang duwa sa unang duha ka kuwarter, apan mi-rally ang Panthers sa third period sa pagpangulo nila ni Arnold Bulak ug Nelson Lim aron molabaw og 12 puntos, 42-30.

Padayong nanginit  ang Panthers sa final period diin gipauwanan nila og puntos ang Scorpions, kinsa nakahimo usab og daghan turnovers nga usa sa hinungdan sa ilang kapildihan.

Si Bulak maoy topscorer sa Panthers sa iyang 39 puntos, samtang ang naparot nga Scorpions gipangulohan sab ni Aldrin Lofranco nga miiskor og 15 puntos.

Sa volleyball event,  ang Green Gorgeous Warriors gisubhan usab og daog sa ilang kampanya dihang   gipukan  nila ang Blue Lady Eagles, 2-1.

 Sila si Rossyl Tacang ug Cecil Castanares maoy  bida Gorgeous Warriors. (BANAT PALARO)