Junior webmasters nakabihag

CEBU, Philippines - Nagbangutan karon ang USC Community tungod sa kamatayon sa 17-anyos nga Accounting student nga si Karen Kaye Montebon, kinsa gipatay sa wala pa hiilhing mamumuno sulod sa ilang balay didto sa Corinthians subdivision, dakbayan sa Lapu-Lapu.  

Daw miduyog sa maong kasubo ang University of  San Carlos Baby Warriors  human sila  mapilde  sa   University of Cebu Junior Webmasters, 66-78 sa semifinals  sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.

Si Froilan Mangubat mibahog og 28 puntos, lakip ang unom ka three-pointers aron pangulohan ang Junior Webmasters, kansang hugot nga depensa maoy hinungdan nga milabaw sila’g 17 puntos, 65-48 sa nahabiling 6:41 sa fourth period.

Ang makapakurat sa maong kadaugan mao ang labing gamay nga sakop sa team nga si Gelmart Umpad, kinsa diriyot mohimo’g triple-double nga mao unta’y labing unang triple double sa kasaysayan sa CESAFI.

Si Umpad, ang gamitoy nga point guard gikan sa Medellin, miiskor og 12 puntos, uban ang 10 ka rebounds, siyam ka assists ug   siyam sab ka steals.

Pulos gyud nagpakita og maayong duwa ang mga sinaligan sa Junior Webmasters nga silang Jason Florence Abejo, Luigi Konrad Gabisan ug John Bryl Cuyos.

 Si Abejo miposa og 16 puntos uban sa 10 ka rebounds, samtang si Gabisan adunay 10 puntos ug 10 sab ka rebounds ug si Cuyos miiskor og siyete puntos.

Ang mga players sa Baby Warriors nagbutang og itom nga panapton sa wa'ang bahin sa ilang upper jersey isip pagduyog sa kasub-anan sa kamatayon ni Montebon. Ang ilang coaching staff nagbutang sab og itom nga “arm band”. 

Ang Junior Webmasters nabiyaan og nuybe puntos human sa first period, 8-17 nga maoy labing daku nga nahimo sa Baby Warriors. Gikan sa 17 puntos nga biya, mi-rally ang Baby Warriors  sa uwahing bahin sa fourth period aron molabaw pag-usab, 42-41 sa katapusang  3:30  human sa basket ni Joshua Laurente. Apan gitubag kini  ni Mangubat og three-pointer alang sa 44-42, nausban pa og laing tres alang sa 47-42 nga bentaha ug gikan didto, wala na makalabaw pag-usab ang Baby Warriors.

Silang Alje Mendez ug Ken Gato maoy nangu sa Baby Warriors sa ilang 15 ug 14 puntos matag usa. (BANAT PALARO)