Semifinals na sa juniors CESAFI
CEBU, Philippines – Magsangka na sab ang topseed Sacred Heart School-Ateneo de Cebu (SHS-AdC) Magis Eagles ug fifth-ranked University of the Visayas Baby Lancers sa pagsugod sa semifinal round sa juniors division sa 15th Cebu Schools Athletic Foundation, Inc. (CESAFI) basketball tournament karong hapon diha sa Cebu Coliseum.
Ang duwa gitakda sa alas-5:15 sa hapon.
Ang Magis Eagles awtomatik nga miabante sa semis uban ang University of San Carlos Baby Warriors isip top two seeds, samtang ang University of Cebu Junior Webmasters ug Baby Lancers kinahanglan pang modaog batok sa tagsa-tagsa nilang kaatbang.
Ang Junior Webmasters mipukan sa University of Southern Philippines, 87-76 niadtong Septiyembre 8, samtang ang Baby Lancers mitagak sa “twice-to-beat” University of San Jose-Recoletos Baby Jaguars niadtong Domingo.
Unang midaog ang Baby Lancers, 68-42 niadtong Septiyembe 10 aron makapugos og ‘rubbermatch’ ug ila kining nausban niadtong Domingo 77-58 aron moabante sa semis.
Sa collegiate division, suwayan sa Cebu Institute of Technology-University Wildcats ang malisud nga tahas sa pagpukan sa no. 1 team University of San Carlos Warriors, kinsa tuyo nga mokulit na sab og lain daog aron magpabiling lider sa duwa nila nga sugdan sa alas-6:45 sa gabii. Ang Wildcats bag-o lang midaog batok sa UC Webmasters niadtong Domingo sa iskor nga 76-69.
Ang Wildcats adto gihapon mosalig sa tandem nilang Allan Dimco ug Joshua dela Cerna, uban nilang Steven Bucao, Marlo Pono ug John Anthony Lucena.
Samtang ang Warriors magsalig sab sa ilang import nga si Shooster Olago uban sa mga lokal nga sila si Charles Pepito, Ian Tagapan, Victor Rabat, Ian Ortega ug Kiefer Lim. (BANAT NEWS)
- Latest
