Lexmark wa gihapoy pilde sa CSCC E-League
CEBU, Philippines – Ang Lexmark Stallions mipakaging sa Sykes Pioneers, 80-69, aron pagpabilin niining bugtong koponan nga way pilde sa 11th CSCC E-League men's basketball tournament niadtong Sabado didto sa City Sports Club-Cebu gym.
Si Sylvester Millevo mipakli og 16 puntos, samtang si Ralph Loren Martinez midugang og 15 puntos alang sa Lexmark, nga wala na molingi pa human milabaw og singko puntos sa unang kuwarter, 18-13, dayon na ngadto sa pagkadlit sa ikapito niining sunod-sunod nga daog.
Si Frederick Montelibano dunay 20 puntos, pito ka rebounds ug tulo ka steals apan wala siya manimaho kay ang Sykes nakatilaw sa ikaunom niining pilde nga giatbangan lamang og usa ka daog.
Sa lain pang mga duwa sa Elite Classic, si Ildefonso Bulangis, Jr. mipabuto og 25 puntos sa Accenture Sharks nga mibuntog sa SSI Warriors, 73-62, alang sa ikalima nilang daog sa pito ka duwa, samtang si Esrom Cuizon, Jr. mitali og 17 puntos uban ang 10 ka rebounds, upat ka assists ug tulo ka steals aron paggiya sa ePerformax Reds ngadto sa 63-49 nga demolisyon batok sa nagkagidlay nga Convergys Blue Devils.
Ang ePerformax nakatilaw sa ikaduha pa lamang niining daog uban ang lima ka pilde, samtang ang Blue Devils mingsukarap sa ikapito niining sunod-sunod nga kaparotan.
Sa bugtong duwa ubos sa Evo League, si Sam Jordan Hermosa mingkulit og 31 puntos, 17 ka rebounds, siyam ka steals, pito ka assists ug upat ka blocks aron pagpangu sa Telstra-Teletech Boomerangs ngadto sa 92-76 nga pagkulating sa Author Solutions, Inc. Hardbacks.
Ang Telstra nagkupot na karon og 7-1 win-loss record, samtang ang ASI nahisugamak sa ikaupat niining pilde sa pito ka duwa. (BANAT NEWS)
- Latest
