AdC overall champ sa Milo Regional Finals

CEBU, Philippines – Ang Sacred Heart School-Ateneo de Cebu mikulit na sab og kasaysayan sa natad sa paugnat sa kusog human gilangkat ang labing una niining kampiyonato sa secondary division sa 20th Milo Little Olympics Visayas regional finals nga hingpit nang gitak-op kagahapon didto sa SMN City-Iloilo.

Human sa tulo ka adlaw nga kumbati, ang SHS-Ateneo mitali og kinatibuk-ang 130 puntos nga igo na kaayong mipakgang sa ambisyon  sa two-time champion University of San Carlos nga maka-grandslam.

Ang USC mitapos lamang sa ikaduhang dapit ning higayona bitbit ang 107 puntos, samtang ang University of San Jose-Recoletos maoy mipahiluna sa ikatulong puwesto human mitali og 72 puntos mugna sa pagharos nila sa mga titulo sa secondary volleyball sa katapusang adlaw sa kompetisyon.

Ang SHS-AdC mitak-op sa ilang kampanya pinaagi sa pag-angkon sa bulawang medalya sa secondary basketball human ilang gipukan ang Taytung-Bacolod sa finals, 88-79. Gawas niini, maayong labok sab ang gipakita sa Ateneans sa athletics, swimming, tennis ug volleyball.

"We are surprised with this but at the same time also very thankful. We are sending a lean, but mean team with only over a hundred athletes.We just always tell them (athletes) to go all out. We are also thankful for the support of the school administration and the parents for this victory," matud pa ni SHS-AdC  athletic director Rico Navarro.

Nagkumpleto sa top 10 sa secondary level mao ang Central Philippines University (65 puntos), Taytung High School-Bacolod (47 puntos), University of St.La Salle-Bacolod (45 puntos), Hua Siong College-Iloilo (37 puntos), Southwestern University (30 puntos), ug Dumangas National School (26 puntos).

Dobleng pagmaya ang nasinati sa SHS-Ateneo gumikan kay first runner-up man sila sa elementary category bitbit ang 70 puntos, dos puntos lamang ang ilang gintang sa back-to-back champion USC.

Ang Subangdaku Elementary School sa Mandaue City maoy nalandig sa ikatulong puwesto bitbit ang 50 puntos. Nagsunod mao ang Talamban Elementary School nga dunay 40 puntos ug Trinity Christian School nga dunay 38 puntos.

Apil sa top 10 ang San Matias Elementary School ug University of Bohol nga dunay 35 puntos matag usa, Central Philippine University nga mitali og 31 puntos, ug ang Maslog Elementary School sa Danao ug St. John Institute sa Bacolod nga parehong mikadlit og 30 puntos. (BANAT NEWS)