Panthers gitukob sa Cobras

CEBU, Philippines - Midaog ang Southwestern University Cobras batok sa University of Southern Philippines Foundation Panthers 81-73  sa seniors division sa 15th Cebu Schools Athletic Foundation, Inc. (CESAFI)  niadtong Huwebes sa gabii didto sa USC gym sa dalan Sanciangko, ning dakbayan.

Tungod sa maong kadaugan, ang Cobras mikatkat na sa ikaduhang puwesto uban sa University of the Visayas Green Lancers sa managsama nilang 7-2 win-loss records

Si Jan Michael Auditor kinsa maoy nangu sa Cobras sa iyang 22 puntos, upat ka rebounds ug adunay tag-usa ka  assist ug  steal maoy nahimong best player of the ballgame.

Silang Mark Jayven Tallo ug Anton Pardo  parehong miamot og 16 puntos, samtang   si Mark Racho miamot og 12 puntos.

Ang Panthers, kinsa nanghinaut nga dili mabokya sa nahibilin nilang tulo ka duwa sa second roud sa elimination, gipangulohan ni Lyndon Colina, kinsa mikamada’g  16 puntos, gisundan ni Karl Langahin sa iyang 14 puntos.

Wala makahuygo silang Brantford Borces ug Kino Matthews Bajamunde nga igo lang miiskor og siyete ug dos puntos matag usa nga usa sa hinungdan sa kapildihan sa Panthers.

Puntos matag usa

SWU (81) – Auditor 22, Tallo 16, Pardo 6, Bautista 10, Racho 10, Luz 5.

USPF (73) –  Colian 16, Langahin 14, Ceniza 10, Quiachon 9, Bajamunde 7, Patalinghug 3, Villamor 3, Bolivar 2, Borces 2, Sastrillas 2, Lava 2, Avancena 2, Alocillo 1.