Baby lancers buhi pa
CEBU, Philippines - Nakabawos ang fifth-ranked University of the Visayas Baby Lancers pinaagi sa paglubong sa twice-to-beat University of San Jose-Recoletos Baby Jaguars, 68-42 aron magpabiling buhi alang sa katapusang luna sa semis sa juniors division sa 15th Cebu Schools Athletic Foundation, Inc. (CESAFI) kagabii didto sa University of San Carlos main gym.
Si Raul ‘Jancork’ Cabahug maoy nangu sa Baby Lancers sa iyang 27 puntos lakip ang 14 ka rebounds,duha ka assists ug duha ka steals aron mahimong best player of the ballgame.
Lahi sa una nilang engkuwentro niadtong Agosto 8 diin gilubong sila og 22 puntos, 53-65, ang Baby Lancers ning higayona grabe kaayong nakaduwa ug wala na kini molingi pa human sa 10-0 nga sugod.
Sayo kaayong nagkaguliyang ang Baby Jaguars ug wala sila makapangandam sa maong duwa hinungdan nga igo lang sila miiskor og kuwatro puntos sa unang kuwarter.
Determinado kaayong modaog ang Baby Lancers, kansang pinakadaku nga labaw miabot ngadto sa 31 puntos, 51-20 kapin sa usa ka minuto sa dili pa matapos ang third period.
Gitapos sa Baby Lancers ang first half sa iskor nga 30-12.
Mi-rally ang Baby Jaguars sa third period, apan bisan pa niana wala makurat ang Baby Lancers ug misamot hinuon kahugot ang depensa sa fourth quarter.
Gawas kang Cabahug, silang Ramesh Alforque ug James Wennard Saliot miiskor sab og double figures alang sa Baby Lancers nga adunay 12 puntos matag usa.
Ang Baby Jaguars nga wala na moabante sa semifinals, gipangulohan ni Renz Ortiz sa iyang 10 puntos apan wala magsilbe silang John Kirk Gonzaga ug Jude Benedict Teleron nga igo lang nagkumboya’g 10 puntos.
Ang Baby Lancers ug Baby Jaguars magtaktakay karong Domingo sa Cebu Coliseum. Ang modaog maoy mokompleto sa semifinal cast uban sa wala’y pildeng Sacred Heart School-Ateneo de Cebu Magis Eagles, University of San Carlos Baby Warriors ug University of Cebu Junior Webmasters. (BANAT PALARO)
- Latest
