Don Bosco ‘grandslam’ sa CESAFI football
CEBU, Philippines - Gisirohan sa Don Bosco Technology Center (DBTC) ang Sacred Heart School-Ateneo de Cebu, 2-0 aron masakmit ang grandslam title sa secondary football event sa 2015 Cebu Schools Athletic Foundation, Inc. (CESAFI) season kagahapon didto sa Cebu City Sports Center.
Si Joseph Rena maoy labing gibayaw ngadto sa himaya gumikan kay siya man maoy milansang sa duha ka goals nga maoy nagpalupad sa Bosconians ngadto sa panganod sa kalipay.
Tam-is sab kaayo nga panimalos ang ilang gihatod sa SHS-Ateneo, nga mipakurat kanila, 1-0 atol sa ilang duwa sa eliminasyon.
Ning higayona, ang mga batos ni coach Glenn Ramos mipakita og igong kadasig ug determinasyon sa tinguha nga dili na sila mausban pa og parot sa ilang karibal.
Si Rena mipasud sa una niyang goal sa ika-30 nga minuto. Human sa mainit nga depensa sa duha ka koponan, si Rena nakamaneho na sab pagpalusot og laing goal aron pagselyado sa kadaugan sa DBTC sa ika-80 nga minuto.
Sa laing duwa, ang University of Southern Philippines Foundation mipukan sa University of San Carlos, 1-0, aron pagpahiluna sa ikatulong dapit. (BANAT NEWS)
- Latest
