Luna sa semis tuyo sa Baby Jaguars

CEBU, Philippines - Ang twice-to-beat University of San Jose-Recoletos Baby Jaguars makigharong sa University of the Visayas Baby Lancers uban ang paglaum nga moabante sa semifinal round sa juniors division sa 15th Cebu Schools Athletic Foundation, Inc. (CESAFI) basketball tournament karong alas-5:15 sa hapon diha sa University of San Carlos main gym sa dalan Sanciangko. Nagkinahanglan lang og usa ka daog ang Baby Jaguars ug paninguhaon nila nga modaog batok sa Baby Lancers aron hingpit na silang moabante sa semis   kauban ang topseed Sacred Heart School-Ateneo de Cebu Magis Eagles, University of San Carlos Baby Warriors ug University of Cebu Junior Webmasters.

Apan kun modaog ang Baby Lancers, adunay mahitabong “rubbermatch” sa sunod adlaw. 

Ang Baby Jaguars mosalig sa ilang shooter nga si John Kirk Gonzaga, forwards  Jude Benedict Teleron ug Joshua Renz Ortiz ug mga bigmen  Arnold Dave Ando ug Geo Ibero.

Sa laing bahin, ang Baby Lancers adto mosalig sa ilang leading scorer ug legitimate big man nga si Raul ‘Jancork’ Cabahug, kinsa maoy labing hait nga hinagiban sa koponan. Apan nagkinahanglan siya og   suporta nilang Ramish Alforque, Royce Alforque Beirn Anthony Laurente, Jim Paul Amistoso ug Michael Membrano.

Sa collegiate division, ang 5-2 nga Southwestern University Cobras laraw nga makigsawo sa ikaduhang dapit sa standing uban sa UV Green Lancers sa ilang pakigsangka batok sa University of Southern Philippines Foundation Panthers sa alas-6:45 sa gabii.

Ang Cobras, kinsa bag-o lang nakatukob og daog batok sa  Cebu Institute of Technology-University Wildcats, 82-76, nagpakita lang gihapon nga usa sila sa top title contender tungod kay bisan og  siyam lang sila ka  players, mogawas gyud ang championship experience.