Kumbati na

CEBU, Philippines – Sugdan na ang kumbati sa quarterfinals sa juniors division sa 15th Cebu Schools Athletic Foundation, Inc. (CESAFI) basketball tournament karong  alas-5:15 sa hapon diha sa Cebu Coliseum.

Ang twice-to-beat University of Cebu Junior Webmasters  mosuway pag-abante sa semifinals dihang ilang ikasangka ang No. 6 University of  Southern Philippines Foundation Baby Panthers.

Ang UC gustong mobawos ngadto sa USPF, kinsa mipilde kanila atol sa elimination round,  68-93 niadtong Agosto 9. Kun ila kining matuman,  hingpit na silang  moabante sa   semifinals.

Ang Junior Webmasters mosalig  sa  trio nilang Froilan Mangubat, John Bryl Cuyos ug Jason Florence Abejo ug ingon man nilang Luigi Konrad Gabisan, Hiljun Hemida, Mardy Paul Soco ug Gelmart Umpad.

Sa ilang bahin, ang  Baby Panthers magsalig sab sa abilidad nilang Ain Obenza, Dennis Archival, George Cometa, Christopher Macalam ug Allen Dave Pelegrino.

Sa collegiate division,  ang University of San Jose-Recoletos mosuway pagkulit sa ilang unang daog sa second round sa elimination dihang ilang sangkaon ang Cebu Institute of Technology-University Wildcats sa alas-6:45 sa gabii.

Ang Jaguars palig-onan nilang Kevin Villafranca, Ralph Dinolan, Mrc Labares, Renzo Senining ug Nelvin Navarra, samtang ang Wildcats nga dili kakompiyansaan, manghinaut nga mamuntos og maayo silang Joshua dela Cerna ug Allan Dimco uban nilang Steve Bucao, Marlo Pono, Wilkins Sanchez  ug John Anthony Lucena. Jr. (BANAT NEWS)