Don Bosco vs SHS-Ateneo sa CESAFI football final
CEBU, Philippines – Ang defending champion Don Bosco Technology Center ug Sacred Heart School-Ateneo de Cebu mipakgang sa tagsa-tagsa nila ka mga kontra aron pag-angkon og katungod nga maoy magsangka sa kampiyonato sa secondary football event sa 2015 Cebu Schools Athletic Foundation, Inc. (CESAFI) season kagahapon didto sa Cebu City Sports Center.
Si Joseph Rena mipauwan og lima ka goals alang sa Bosconians, nga mipahayag og maayo sa ilang kampanya nga madepensaan ang ilang trono pinaagi sa pagpatikalbong sa University of San Carlos, 6-1.
Si Rena mipasud sa nag-una nilang duha ka goals sa 8th ug 42nd minute. Human ang USC naka-iskor sa labing una ug bugtong nga higayon sa 58th minute, si Rena mipabuhagay na sab og tulo ka sunod-sunod nga goals sa 51st, 63rd ug 68th minute sa wala pa hingpit nga giselyado ni Justin Genson ang kadaogan sa Don Bosco.
Impresibo sab kaayo ang SHS-AdC sa 5-0 niining demolisyon sa University of Southern Philippines Foundation. Si Joshua Shields naka-iskor dayon sa duha ka minutos pa lamang nga nakaon sa duwa, samtang si Paul Buena mipasud sa iyang goal sa ika-33 nga minutos aron paghatag sa SHS-Ateneo og 2-0 nga bintaha sa halftime.
Misalida sab dayon si Jaime Aquino sa ika-47 nga minuto, sa wala mibirada silang Leo Maquiling ug Raphael Villahermosa sa 52nd ug 79th minute nga maoy hingpit nga nakapatukay-ang sa USPF.
Ang Don Bosco ug SHS-Ateneo gikatakda nga mag-ilog sa korona karong Miyerkules sa susama gihapon nga binyu. (BANAT NEWS)
- Latest
