Webmasters lubong sa Lancers

CEBU, Philippines – Wa'y kukalooy nga gidemolis sa University of the Visayas Green Lancers ang University of Cebu Webmasters pinaagi sa pagkulit og 91-62 nga kadaogan kagabii sa sangka sa seniors division sa nagpadayon nga 15th season sa Cebu Schools athletic Foundation, Inc. (CESAFI) didto sa Cebu Coliseum.

Ning pagsuwat, nagsangka pa ang solo leader University of San Carlos Warriors kinsa nagtinguha nga morekober dayon human sila pakurati sa wa'y import ug undermanned nga Southwestern University Cobras, 76-75 sa miaging semana pinaagi sa three-pointer ni Jovanie Luz sa nahibiling 0.1 segundo.

Ugmang adlawa, sugdan na ang quarterfinal round sa juniors division magsangka ang no. 3 seed University of Cebu Junior Webmasters batok sa no. 6 seed ang University of Southern Philippines Baby Panthers samtang magtakos ang no. 4 University of San Jose Recoletos Baby Jaguars batok sa no. 5 University of the Visayas Baby Lancers.

Parehong naghupot og twice-to-beat advantage ang Junior Webmasters ug ang Baby Jaguars kinsa nagkinahanglan lang og usa ka daog aron moabante sa semifinals uban sa 8-0 nga Sacred Heart School-Ateneo de Cebu Magis Eagles ug sa 6-2 nga USC Baby Warriors.

Kanunay naglabaw og  dako ang Lancers kagabii ug wala gani kaayo hatagi og taas nga playing time ang ilang import nga si Steve Cedrick Akomo kinsa igo lang mi-iskor og otso puntos.

Ang Lancers kinsa gipangulohan ni JV Veloso sa iyang 13 puntos aron mahimong best player, aduna nay 7-2 nga baraha samtang ang Webmasters kinsa wala'y import sama sa ubang lima ka teams, midailos ngadto sa 3-5 aron makigtabla sa Cebu Institute of Technology-University Wildcats.

Si Veloso mihimo sab og lima ka rebounds ug duha ka asissts.

Miabot man tuod og 32 puntos ang labaw sa Lancers,81-49 may 6:18 ang  oras sa fourth quarter bisan pa sa mini run nga gihimo sa Webmasters, apan ang pinakadakong labaw nga ilang nahimo mao ang 34 puntos, 51-17 may 4:27 ang oras sa second period.

Silang Alwyn Aguirre ug Rey Suerte parehong miamot og 10 puntos matag usa alang sa Lancers kinsa gipakaging sa Wildcats sa miaging semana.

Pareho sab may 10 puntos matag usa silang Filvenson Culango ug Melvin Butohan arong pangulohan ang opensa sa Webmasters.

Puntos mata usa:

UV (Srs.) 91 – Veloso 13, Aguirre 10, Suerte 10, Akomo 8, Mendoza 8, Cabanero 7, Codilla 6, Santillan 6, Macion 6, Balabag 6, Napao 4, Manzo 4,  Arong 2.

UC (Srs.) 62 – Culango 10, Butohan 10, Codilla 7, Tagudin 7, Dacalos 5, Puerto 5, Suelto 4, Jabello 4, Montilla 3, Mayol 3, Grafilo 2, Dumat-ol 2. Halftim: 51-22. (BANAT NEWS)