Archers, Generals unahang pumuwesto sa semis
MANILA, Philippines – Paglalabanan ng La Salle Archers at Emilio Aguinaldo College Generals ang isang upuan sa semifinals habang iiwas din ang NCBA Wildcats na mameligro ang hangaring magpatuloy ang laban sa Spikers’ Turf Collegiate Conference ngayon sa The Arena sa San Juan City.
Ang Archers, Generals at Wildcats ay magkakasama sa ikatlo hanggang ikalimang puwesto sa 3-3 karta at may posibilidad na magkaroon ng playoff para sa huling upuan sa semis.
Sa ganap na ala-1 ng hapon magtutuos ang La Salle at NCAA champion EAC at ang mananalo ay makakasama na ng Ateneo at NU Bulldogs.
Ang matatalo ay kailangang manalangin na matalo ang Wildcats sa talsik ng UP Maroons sa huling laro sa alas-3 ng hapon.
Kung magwagi ang NCBA, sila na ang kukumpleto sa apat na koponan na maglalaban sa semifinals sa ligang inorganisa ng Sports Vision at handog ng PLDT Home Ultera.
Ngunit kung masilat ng Maroons ang Wildcats ay magkakaroon ng sudden-death ang NCBA at ang matatalo sa unang laro.
Nanalo sa pamamagitan ng straight sets ang EAC sa UP sa huling laro na nangyari noon pang Agosto 24 at malalaman kung may epekto ito sa ipakikita sa mahalagang laro laban sa La Salle.
- Latest
