USJ-R spikers, 2-0 na sa CESAFI volleyball

CEBU, Philippines – Nakabangon ang University of San Jose-Recoletos  spikers  human mahisukamod sa unang set aron pagpakgang sa University of  San Carlos sud sa upat ka sets ug ingon pag-angkon sa liderato sa women’s volleyball event sa 2015 Cebu Schools Athletic Foundation, Inc. season kagahapon didto sa USJ-R Basak campus gym.

Human matakilpo sa unang set, 20-25, ang  Spiking Jaguars ni coach Grace Antigua nakabawos gilayon pinaagi sa pagmakmak sa USC sa ikaduhang set, 25-23.

Ang USJ-R munasginhawang nakadaog sa ikatulong set, 28-26, ug nasustinir nila ang ilang kainit dayon na ngadto sa pagpatikangkang sa USC sa hingpit sa ikaupat nga set, 25-11.

Gumikan niini, ang Spiking Jaguars nagsolo karon sa liderato bitbit ang baraha nga 2-0. Ilang giabli ang ilang kampanya pinaagi sa pagpakaging sa Cebu Doctors’ University.

Sa laing duwa sa women’s division, ang defending champion Southwestern University nag-agi usa og makutas nga dalan sa wala pa niini pildiha ang University of Southern Philippines Foundation sud sa kulbahinam nga lima ka sets, 25-22, 22-25, 25-10, 23-25, 15-10.

Sa secondary division, ang SWU girls hingpit nang nakaangkon og luna sa semifinals human mikolekta sa ikaupat nilang daog sa lima ka duwa pinaagi sa pagpakaging sa USPF, 25-19, 25-11. (BANAT NEWS)