UC Junior Webmasters nagkaduol na sa ilang gidamgong “top four”
CEBU, Philippines - Nagkaduol na ang University of Cebu Junior Webmasters sa ilang tinguha nga moabante sa top four human makaipsot batok sa Cebu Eastern College Dragons, 66-65 sa 15th Cebu Schools Athletic Foundation, Inc. basketball tournament kagahapon didto sa Cebu Coliseum.
Silang Froilan Mangubat miposa’g 19 puntos, si John Bryl Cuyos midugang og 17 puntos, samtang si Florence Abejo adunay 10 puntos alang sa 5-2 nga Junior Webmasters.
Ang Dragons, kinsa nagtangag og 1-5 nga baraha, gipangulohan ni Johanne Miguel Orillaneda sa iyang 17 puntos, gisundan nilang James Daniel Tempra ug John Vincent Galarse nga parehong adunay 13 puntos.
Sa laing duwa, ang UV Baby Lancers milubong sa USPF Baby Panthers, 87-65.
Si Raul ‘Jancork’ Cabahug maoy nangu sa Baby Lancers sa iyang 20 puntos uban sa 17 ka rebounds ug tulo ka steals, samtang si Ramesh Alforque miamot og 17 puntos. Silang Beirn Anthony Laurente ug Joshua Yerro mitampo’g 14 ug 10 puntos matag usa alang sa Baby Lancers.
Nangu sab sa Baby Panthers mao si Dennis Archival pinaagi sa iyang 14 puntos, gisundan ni Ain Obenza nga adunay 11 puntos ug Chris Macalam nga miamot og 10 puntos. (BANAT NEWS)
- Latest
