Warriors, Cobras mag-usab

CEBU, Philippines - Ang   haring gangis nga University of San Carlos Warriors laraw na sab nga mohimo og daog batok sa Southwestern University Cobras dihang magsangka kini pag-usab sa 15th Cebu Schools Athletic Foundation, Inc basketball tournament karong adlawa diha sa Cebu Coliseum.

Human sa ilang 6-0 sweep sa first round sa eliminasyon, ang Warriors buot na  sab  nga mapahamtang og laing kapildihan  ngadto sa defending champion nga Cobras. Ang Warriors midaog sa Cobras, 76-64 atol sa ilang unang sangka niadtong Agosto 2 ug ilang ipakita ang ilang pagkadominante batok sa undermanned  nga Cobras.

Karong mga higayona, misamot na kalisud pildihon ang Warriors kay nakuha na nila ang hustong templada aron mosaler ang ilang teamwork sulod sa korte.

Mitaas na sab ang porsiyento sa ilang import nga si Shooster Olago sa iyang tira gikan sa free throw line.   

Mas lisud pa buntogon ang Warriors kun mangigo ang ilang perimeter gunners nga silang Ian Tagapan, Nico Magat, Ian Ortega ug Victor Rabat.  Anaa pa kanila ang Fil-Australian nga si William McAloney, Maverick Suarez ug Donal Adlawan sa post, Giovanni Laguyo, Christian Maconocido ug Keifer Lim sa backcourt.

Sa ilang bahin, ang Cobras nagsalig nilang Anton Pardo, Giovanni Luz, Melvin Holper ug Mark Jayven Tallo. Nanghinaot ang Cobras nga mangigo sa ilang tirada sa gawas ang tulo nga maoy bugtong nilang paglaum nga makabawos sa Warriors.

Ang Warriors-Cobras rematch duwaon sa alas-5:30 sa hapon human sa  engkuwentro tali sa University of the Visayas Green Lancers  ug Cebu Institute of Technology-University Wildcats nga sugdan sa alas-4 sa hapon.

Sa secondary matches, ang University of San Jose-Recoletos Baby Jaguars mohamag sa Don Bosco Technology Center Junior Greywolves sa ala-1 sa hapon, sundan sa duwa tali sa CIT-U Wildkittens ug Sacred Heart School-Ateneo de Cebu Magis Eagles. (BANAT NEWS)