Dragons lupig sa Baby Jaguars
CEBU, Philippines - Mikulit og ‘come-from-behind’ nga kadaugan ang University of San Jose Recoletos Baby Jaguars batok sa Cebu Eastern College Dragons, 59-55 sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.
Daku kadtong bihag alang sa Baby Jaguars, kinsa nagsugod og 0-11 sa nahabiling tres minutos sa first period ug natapos ang maong kuwarter sa iskor nga 8-17.
Gisugdan sa Baby Jaguars pagpakurat ang Dragons dihang mi-rally sila sa second quarter aron molabaw og usa ka palito sa halftime, 30-29 human sa buzzer-beating lay-up ni Joshua Renz Ortiz.
Diriyot mahanaw ang 10 puntos nga labaw sa Baby Jaguars, 56-46 sa uwahing bahin sa duwa dihang mihimo’g 9-5 run ang Dragons sa daginutong oras aron mosikit sa iskor, 58-55 sa katapusang 39 segundos sa final period. Ang usa ka free throw ni Yannick Noah Enriquez sa katapusang 17.8 segundos maoy nagselyado sa ilang kadaugan.
Si John Kirk Gonzaga maoy nangu sa Baby Jaguars sa iyang 19 puntos, samtang silang Enriquez ug Ortiz parehong miabuno’g 12 puntos.
Ang Dragons nga nagtangag og 1-4 nga baraha, gipangulohan ni John Vincent Galrase sa iyang 13 puntos, gisundan nilang Garnird Leopoldo ug James Daniel Tempra sa ilang 11 puntos matag usa. (BANAT PALARO)
- Latest
