Magkaribal magtigi sa CESAFI karon
CEBU, Philippines - Ilog alang sa ikaduhang puwesto sa first round sa eliminasyon maoy nakataya tali sa defending champion Southwestern University Cobras ug sa University of the Visayas Green Lancers nga magtakus sa main game sa 15th Cebu Schools Athletic Foundation, Inc. karong adlawa diha sa Cebu Coliseum.
Ang higpit nga magkaribal mag-abot sa alas-6:45 sa gabii.
Ang Green Lancers (4-1) ug ang Cobras (3-1) parehong nakatilaw og pilde gikan sa mga kamot sa University of San Carlos Warriors, kinsa mitapos sa first round pinaagi sa 6-0 sweep.
Tungod kay wala na kanila tali sa Green Lancers ug Cobras ang motupong sa Warriors, maoy ilang ilogan ang ikaduhang puwesto.
Mahimong tapuson sa Green Lancers ang first round sa baraha nga 5-1 sa higayon nga ilang pildihon ang undermanned nga Cobras nga aduna la’y siyam ka players.
Gawas sa ilang Nigerian reinforcement nga si Steve Cedrick Akomo, ang Green Lancers adunay mga hinagiban pagpukan sa Cobras. Anaa kanila ang mga kasaligang beterano nga sila si Franz Arong, Alfred Codilla ug Arvie Cabanero nga mohatag og liderato nilang Leonard Santillan, Jerome Napao, Vincent Mendoza, Rey Suerte ug rookie pointguard June Kent Mendoza.
Sa ilang bahin, ang Cobras maghangad gihapon sa ilang star playmaker nga si Mark Jayven Tallo, Giovannie Luz, Anton Pardo, Jan Michael Auditor, Melvin Holper ug Jesse Bautista.
Sa juniors division nga gikatakda sa alas-5:15 sa hapon, ang University of San Jose-Recoletos Baby Jaguars makigsangka batok sa Cebu Eastern College Dragons. (BANAT NEWS)
- Latest
