Gilas mouli nga way daog sa Estonia
CEBU, Philippines – Pakyas ang Gilas Pilipinas pagsakmit bisan og usa ka daog sa 2015 Toyota Four Nations Cup, usa ka pocket-tournament nga gipahigayun didto sa Estonia.
Sa katapusan nilang duwa, ang Gilas subling mipakita og grabeng determinasyon nga mudaog batok sa Iceland apan napilde, 76-86.
Hinuon di sama sa unang duha nila ka pilde batok Netherlands ug Estonia, ang Gilas mipakita og kusug nga opensa sa first half diin igo lang naglabaw og singko puntos ang Iceland, 38-43, sa halftime.
Miposte ang Iceland og 15 puntos nga labaw pag-abot sa third period, apan mipakita sa ilang dakung tinguha nga mudaog ang mga Pinoy ug nanaug ang labaw ngadto sa otso puntos, 73-81.
Gikan didto kapila misuway og rally ang Gilas apan nakabsan sila sa oras tungod usab kay kanunay nga matubag og puntos sa Iceland ang ilang opensa.
Si Andray Blatche nangulo sa Gilas sa iyang 22 puntos, samtang si Terrence Romeo mihimo og 17 puntos ug si Jayson Castro adunay 10 puntos.
Sunod nga pangandaman sa Gilas ang William Jones Cup sa Taiwan nga laing tune-up tournament sa dili pa ang 2015 FIBA Asia Championship sunod buwan didto sa China. (BANAT NEWS)
- Latest
