Power Forty pakyas pagsakmit sa titulo

CEBU, Philippines - Mibahar ang opensa sa Power Forty sa hinapos nga bahin sa duwa nga nadiskuwido sa ilang kampanya  alang sa korona sa Saint Augustine Cup 2015 Inter-ballclub basketball tournament.

Pabor unta sa tapad ang beteranong Power Forty nga gilangkuban sa mga magduduwa nga nagpangedaron og 40-anyos pataas, apan nalupig kini sa lahutay batok sa mas batan-on ug gagmay nga Fasiba, 80-85 sa ilang duwa sa finals niadtong Huwebes sa gabii didto sa Inayawan Sports Complex, ning siyudad.

Sakit kaayo ang maong kapildihan sa Power Forty ni coach Michael Arias ug mga  sakop sa coaching staff nga silang Edwin Dejacto Sr., Dome Ozon ug Efren Mosqueda gumikan kay sila man ang nagkontrol sa duwa gikan sa pagsugod hangtod sa daginutong oras sa fourth quarter. 

Ang Power Forty labaw og sayes puntos, 74-66, apan tungod kay nahutdan sila sa hangin,  naluya na kini ug  nailog sa Fasiba ang momentum. Ang Power Forty katapusang nilabaw sa iskor nga 80-78  ug sukad  niadto wala na kini moirog pa hangtod nahurot ang oras.

Ang Fasiba angay nga magpasalamat ni Cesar Ortega, kinsa gidemalas sa free throw diin pulos kagar ang iyang unom ka tira sud sa nahabiling 1:10 sa final period.

Si Eboy Cabellon miiskor og 19 puntos,  samtang sila si Dodong Denora ug Boy Cruz nagkumbinar og 31 puntos.

Gipangulohan sab ni Robert Abasolo ang Power Forty nga miarangkada og 26 puntos, gisundan ni Julian Capala sa iyang 12 puntos ug Alex Mercado nga adunay 10 puntos.

Si Ortega miamot lang og otso puntos alang sa Power Forty nga gipaluyohan   sa ilang presidente nga si Lando Almojallas ug sa mga team managers sa maong ballclub nga silang Atty. Flor Yosores sa HLY, Vez Eleguin sa Water Market, Romy Rama sa Park ‘N Go, Bob Samson ug Chino Kalinga sa Bob & Chino ug ingon man ni Fred Tantoy, usa sa mga tag-iya sa Water Market.

Ang torneyo nga usa sa mga highlights sa kapistahan ni Saint Augustine, ang mahal nga patron sa Inayawan, gidumala ni league commissioner ug barangay councilor Insik Tibay inabagan ni Kenneth Montaña isip technical committee. (BANAT NEWS)

PUNTOS MATAG USA

FASIBA (85) – Cabellon 19, D. Denora 16, Cruz 15, Atillo 9, Yncierto 7, Azucena 7, Denora 5, Monter 3, Sagmon 2, Quiobe 2.

POWER FORTY (80) – Abasolo 26, Capala 12, Mercado 10, Ortega 8, Nacario 6, Tantiado 5, Dequit 5, Navares 4, Yatan 2, Sumargo 2.