Magis Eagles, 5-0 na

CEBU, Philippines - Taud-taud unang nanginit ang  Sacred Heart School-Ateneo de Cebu Magis Eagles sa wala pa nila madagit ang  ikalima nilang sunod-sunod nga kadaugan pinaagi sa paglubong sa University of San Jose-Recoletos Baby Jaguars,  69-44, aron magsolo  sa liderato sa 15th  Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.

Bisan og pareho silang naglisud pagpatuman sa ilang opensa nga miresulta sa usa ka low-scoring first period, 15-8, kanunay naglabaw ang Magis Eagles ug ilang gisugdan og lubong ang Baby Jaguars pagsugod sa second period.  Wala nila tugoti ang Baby Jaguars nga makaiskor sa halos pito ka minutos. Gitapos sa Magis Eagles ang first half sa iskor  nga 36-21.

Ang Magis Eagles gipangulohan ni Jed Colonia, kinsa miposa og 16 puntos uban sa iyang 10 ka rebounds, upat ka assists ug lima ka steals aron mahimong best player of the ballgame sa Viva Sports TV.

   Si Patrick Yu midugang og 15 puntos lakip ang upat ka three-pointers.

Ang Baby Jaguars nga  kausa ra makatilaw og labaw, 8-6  gipangulohan ni John Kirk Gonzaga pinaagi sa iyang 20 puntos. (BANAT PALARO)