Lalabanan pa si Pacquiao: Roach ‘di naniniwala kay Mayweather
MANILA, Philippines – Pagkakataong dagdagan pa ang kinita sa pagbo-boxing ang pinaniniwalaan ni trainer Freddie Roach upang hindi matuloy ang sinasabing pagreretiro ni Floyd Mayweather Jr. sa pagtatapos ng taon.
Lalabanan ni Mayweather si Andre Berto sa Setyembre 12 at sinasabing ito na ang kanyang huling laban at inaasahang aakyat ang karta sa 49-0.
Nasasabi na magreretiro na siya dahil ito rin ang huling laban sa anim na laban na pinirmahan sa Showtime.
“Don’t believe it,” wika ni Roach sa The Daily Mail. “Floyd will fight on to his 50th. Too much money to be made. Especially if he fights Manny (Pacquiao) again.”
Sina Pacquiao at Mayweather ay nagtuos noong Mayo 2 at winasak ng laban ang mga records ng kita sa boxing.
Natalo si Pacman dahil sa may inindang right shoulder injury at patuloy ang paniniwala ni Roach na sila ang mananalo kung hindi nagkaroon ng aberya.
Nagpapagaling pa sa ngayon si Pacquiao ngunit inaasahang babalik ng ring sa Pebrero at nais ni Roach na si Danny Garcia ang siya nilang makaharap.
“The fight we want is Danny Garcia,” pahayag pa ni Roach. (AT)
- Latest
