J. Espina Agrivet, third sa UBFL tourney
CEBU, Philippines – Trese ka three pointers ang gibuhian ni Jonher Espina arong pangulohan ang J. Espina Agrivet nga milubong sa Double-R, 132-107 ug ingon man pagsakmit sa third place trophy sa Uling Basketball Fiesta League 2015 niadtong Agosto 12 didto sa Brgy. Uling gym, Naga, Cebu.
Ang J. Espina Agrivet ubos sa maayong pagtimon ni coach Johnny Diet, nakahipos na sab og daghang championship trophies sa nanglabay’ng mga torneyo.
Sa kinatibuk-an, ang giilang ‘three-point king’ nga si Espina mikutlo og makabungog nga 45 puntos, lakip ang iyang half court buzzer-beating pagtapos sa second period.
Si Espina, anak ni J. Espina Agrivet team owner/manager Jojie Espina.
Wala hinuon mag-inusara si Espina pag-agak sa koponan kay laing tulo niya ka teammates ang miiskor og double figures. Si Jean Marie Mpouma mipabuhagay og 30 puntos diin 19 niini iyang nahimo sa second half, mitampo sab og 16 puntos si John Paul Alcaraz, samtang si James Regalado miambit og 10 puntos alang sa J. Espina nga maoy midiktar sa tibuok duwa.
Interesante kay ang tanang walo ka players sa J. Espina Agrivet pulos nakaiskor diin si Axel Rabaya miantog og nuybe puntos, samtang sila si Leodi Garcia ug Pacaña mitampo’g otso puntos matag usa ug si Frank Nailon adunay sayes puntos.
Ang Double-R nga bisan gilubong mikayod gihapon sa pagpangulo nilang Navarro ug Sebial aron makan-an ang labaw. Apan wala mosalir ang ilang mga paningkamot kay si Espina nagpauwan og 3-point shots aron inaton pagbalik ang labaw paingon na sa 25 puntos nga demolisyon.
Ang Uling Basketball Fiesta League 2015 gipasiugdahan sa ilang Brgy. Capt. nga si Justino L. Dakay diin iyang gipiyal ang mga gimbuhaton ngadto sa working committee nga naglangkob nilang Eubert B. Pardillo, Jhonflor Gimenez ug Marchriel Villarmea. (BANAT NEWS)
- Latest
