Gilas masuwayan sa Jones Cup

CEBU, Philippines – Makasugat og lisud nga hagit ang Gilas Pilipinas sa ilang pagsalmot sa William Jones Cup tournament sa Agosto 29 didto sa Taiwan.

Ang William Jones Cup magsilbe nga tune-up tournament sa Gilas sa dili pa sila moduwa sa 2015 FIBA Asia Championship sa Septiyembre didto sa China.

Taliwala sa nagkadaiyang suliran sa koponan sa ilang line-up, ang Gilas mosung sa Jones Cup diin ikasangka nila ang upat sa mga lig-ong Asian teams nga posible nila nga ikaatubang og balik sa FIBA  Asia.

Una niini mao ang No.1 team sa Asya nga Iran nga pangulohan ni ex-NBA center Hamed Haddadi.  Ang Pinas katapusang miduwa sa Jones Cup niadtong tuig 2013 diin sila ang mikampiyon.

Gawas sa Iran, makaduwa usab sa Gilas ang karibal nga South Korea, Chinese Taipei ug Japan. Mokumpleto sa mga koponan nga musalmot sa maong torneyo naglakip sa Russia, New Zealand ug United States.  — LPM gikan sa Philstar.com