Aboitiz football finals karon nang Huwebes
CEBU, Philippines – Ang kanhi team captain sa Philippine Azkals nga si Chieffy Caligdong ug ang uban pang Manila-based players nga sakop sa Team ERCO BRO Gau nagpanikad nang moduwa batok sa Leylam FC alang sa kampiyonato sa men’s open division sa 2015 Aboitiz Football Cup karong Huwebes sa gabii diha sa Cebu City Sports Center.
Ang tulo sa lima ka reinforcements sa ERCO nga sila si SEA Games campaigner Ronnie Aguisanda, Mark Ferrer ug Dodong Villareal gikatakda nga moabot karong adlawa.
Sa iyang bahin, si Ian Araneta motaak dinhi sa Sugbo ugma, samtang si Caligdong mobutho sa adlaw na mismo sa duwa gumikan kay atua pa siya karon sa Cambodia isip miyembro sa coaching staff of Phl Under-16 squad.
Ang Sugbuanong goalkeeper nga si Paolo Pascual dili hinuon makaduwa uban sa ERCO gumikan kay duna kini laing atimanon nga mas importante.
Apan bisan sa kalig-on sa ilang koponan, si coach Glen Ramos nagkanayon nga wala pa’y kasiguroan nga sila maoy mosakmit sa korona gumikan kay pipila sa ilang mga regular players ang wala na sa ilang team.
Kahinumduman nga ang ERCO ug ang Leylam FC magtigi sa titulo niadto pa untang Hunyo 28, apan nakanselar ang ilang duwa gumikan sa dili maayong panahon inubanan sa makusog nga pagbunok sa ulan. (BANAT NEWS)
- Latest
