Dragons batok Wildkittens

Mga Duwa Karon (Cebu Coliseum)

5:15 pm – CEC vs. CIT-U (Jrs.)

6:45 pm – USJ-R vs. CIT-U (Srs.)

CEBU, Philippines – Suwayan sa Cebu Eastern College Dragons nga mokulit sa ilang ikaduha nilang daog sa dihang ilang sangkaon ang Cebu Institute of Technology-University Wildkittens sa juniors division sa 15th season sa Cebu Schools Athletic Foundation, Inc. (CESAFI) karong adlawa diha sa Cebu Coliseum.

Duha na unta ang daog sa Dragons batok sa University of Southern Philippines Foundation  ug Don Bosco Technology Center, apan ang ilang daog sa Baby Panthers gi-forfeit human ang liga nakakita nga si Mark James Roa sa CEC lapas sa edad.

Sa seniors division, ang University of San JoseRecoletos Jaguars ug CIT-U Wildcats tuyo nga mokulit sa labing una nilang daog sulod sa tulo ka duwa.

Ang Jaguars midaog sa University of Cebu Webmasters, 85-68 sa season-opening match niadtong Agosto 1, apan ang ilang daog gi-forfeit sa CESAFI pabor sa Webmasters kay wala makatuman pagsumitir ang Jaguars sa resulta sa ilang electrocardiogram sa gikatakdang petsa nga gihatag sa liga.

Si USJ-R coach Jun Noel magsalig gihapon nilang Jaybie Mantilla, Ralph Dinolan ug Juan Miguel Gastador, samtang ang Wildcats, magsandig  sab sa ilang mga sinaligan sama nilang Joshua de la Cerna, Allan Dimco, Jeffrey Taghoy ug Mark Kong. (BANAT NEWS)