11 teams mobanat sa Shakey’s GVL

CEBU, Philippines – Miabot ngadto sa 11 ka teams ang magtigi alang sa korona sa Central Visayas leg sa Shakey’s Girls’ Volleyball League Season 13 nga gikatakda karong Agosto 13-16 diha sa Cebu City Sports Institute (CCSI) gym sa Barangay San Nicolas, Cebu City.

Nag-una sa listahan sa mga entranteng koponan mao ang defending champion University of San Carlos uban ang Southwestern University-Phinma Education, University of  San Jose-Recoletos,  Sacred Heart School-Ateneo de Cebu,  St. Theresa’s College ug Pajo National High School sa  Lapu-Lapu City.

Mokumbati sab ang Sacred Heart School-Hijas de Jesus, University of Cebu, Abellana National School,  University of Southern Philippine Foundation ug PAREF-Southcrest.

Si tournament director Jordan Paca nagkanayon nga ang mga partisipante bahinon sa duha ka bracket. Moduwa sila ubos sa single round robin format, diin ang top two matag bracket maoy magharong sa crossover semifinals. Ang mga mananaog magsangka dayon alang sa kampiyonato.

Gawas sa titulo, ang makampiyon makaangkon sab og katungod nga morepresentar sa Central Visayas sa Shakey’s GVL League of Champions didto sa Biñan, Laguna sa Nobiyembre. (BANAT NEWS)