UV Lancers, 3-0 na

CEBU, Philippines – Gilat-an  sa  University of the Visayas Green Lancers ang huyang nilang karibal University of Cebu Webmasters, 77-62 aron magsolo sa liderato sa 15th Cebu Schools Athletic Foundation, Inc. (CESAFI) basketball tournament kagabii didto sa Cebu Coliseum.

Ang kanhi sakop sa Philippine Youth team nga si Leonard Santillan ug Alwyn Aguirre parehong mitusak og 13 puntos alang sa Green Lancers nga   kasamtangan nagtangkil   og 3-0 nga baraha.

Si Kent Mendoza mipugnit sab og 12 puntos alang sa mga batos ni coach Gary Cortes nga miposte’g 41-27 nga bentaha sa halftime. Miburot pa kini ngadto sa 18 puntos, 55-37 sa nahabiling tres minutos sa duwa sa third period.

Napahakan hinuon sa Webmasters ang labaw ngadto na lang sa nuybe, 50-59 human silang Justin Dacalos ug Joseph Mayol mipabuto og tulo ka sunod-sunod  ka three-pointers.

Wala hinuon mahulga ang Green Lancers kay mipabuto sab sila og 14-2 nga bomba aron molansang sa labing daku nilang labaw, 21 puntos, 73-52 sa katapusang tres minutos sa duwa.

Si Dacalos mao lang ang bugtong nakahimo’g double figures pinaagi sa iyang 16 puntos alang sa Webmasters, kinsa nakatilaw sa ikaduha nilang kapildihan sud sa tulo ka duwa.

Sa juniors division, nakamugna og  triple-tie sa unang puwesto ang Sacred Heart School-Ateneo de Cebu Magis Eagles human makadagit og daog batok sa Cebu Institute of Technology-University Wildkittens, 72-47.

Ang Magis Eagles nagtabla na karon tali sa title contenders University of San Carlos Baby Warriors ug sa Cebu Eastern College Dragons nga pulos adunay 2-0 nga baraha.

Silang Andrew Velasco, Patrick Yu ug Phil Renzo Calumpang nagkumboya’g 36 puntos aron pangulohan ang Magis Eagles.

Bugtong si Jasper Berezo lang ang mihimo’g  double figures alang sa Wildkittens pinaagi sa iyang 13 puntos.

Sa laing duwa, si Ain Obenza miburak og 30 puntos aron mangu sa  University of Southern Philippines Foundation Baby Panthers pagbuntog sa UC Junior Webmasters,  93-68.

Si Gerge Cometa miamot sab og 15 puntos aron  hungitan ang Baby Panthers sa una nilang daog.

Ang Junior Webmasters gipangulohan nilang Jason Florence Abejo ug Luigi Kondrad Gabisan nga  parehong miposa og 16 puntos. (BANAT NEWS)