Tumba dayon

DUBAI –  Gipamatud-an ni ‘Prince’ Albert Pagaranga andam na siya nga mahimong umaabot nga Pinoy world champion.

Iya  kining gipakita atubangan sa liboan ka mga OFWs (Overseas Filipino Workers) dinhi sa Dubai. Si Pagara (24-0, 17KOs) nanginahanglan lang og  usa ka round aron pagpukan sa  overweight  Mexican  challenger nga si Jesus 'Chito' Rios (31-8, 25KOs) aron  sab   mapanalipdan ang iyang IBF junior featherweight title sa main  event sa  “Pinoy Pride 32: Duel in Dubai 2” sa miaging gabii  didto sa nagsugwak nga Dubai World Trade Center.

Maiya lang gihapon ni Pagara ang bakus sa wala pa siya mosaka sa ring batok ni Rios kay ang Mehikano pakyas pagkuha sa 122-pound weight limit atol sa official weigh-in niadtong Huwebes.

Gisukod  pa sa 21-anyos nga Pinoy boxing star ang Mehikano sa mga unang gutlo sa away. Human   mabasa  ang  inawayan sa iyang kaatbang,  si Pagara mikonektar sa iyang right straight nga nakapatumba ni Rios.  Abtik hinuon nga mibarog si Rios,  apan  gibanatan na sab ni Pagara  nga nakapaaghat ni referee Bruce McTavish  pag-undang sa away duha ka minutos sa opening round, hinuon, awahi na tungod kay  wa’ay panimuot nga nagkumpayot sa ring sa dihang gihunong kini.

Ang kadaugan naghatag og kasiguroan ni  Pagara nga moaway didto sa Estados Unidos sa Oktubre 17 didto sa Stubhub Center sa Carson City, California.

“Para sa akoa lang, andam na gyud ko para sa world title, pero nagdepende rako sa akong manager ug promoter,” sumala pa ni Pagara.

Sa iyang bahin si ALA Promotions President and CEO Michael Aldeguer nagmaya sa gipakita sa iyang boksidor, apan nagtuo nga kinahanglan pa og dugang exposure gawas sa nasud si Pagara aron mahimo kining perpektong world title contender.

Samtang yano ra kaayong midaog si Albert,  ang iyang maguwang  nga si Jason  ‘El Nino’ Pagara (36-3, 22KOs) misungasong  pa  og lisud nga away batok ni Ramiro ‘Xixime’ Alcaraz  (15-5, 9KOs) sa wala pa niya makuha ang seventh round technical decision nga kadaugan.

Nahimong hugaw ang maong sangka dihang gikuhaan dayon og uno punto si Alcaraz human niini gi-headbutt si Pagara sa first round. Miresulta kini sa gisi sa kilay sa ALA boxer, apan imbes maluya, misamot hinuon ang kaisog ni Pagara, kinsa wala’y kukahadlok nga miataki ngadto ni Alcaraz. Subling gikuhaan og puntos si Alcaraz sa dayong tapos sa fifth round  dihang mitikdol  pa siya ni Pagara   bisan og mibagting na ang kampanilya. 

Nakadugang kini sa  kaagresibo ni Pagara nga moataki, apan sa makausa pa, nagbangga na usab ang ulo sa duha nga  nakapagisi og samot sa kilay sa Pinoy boxer.

Giundang ang away ug si Pagara ang midaog sa scorecards 77-73, 78-72, 76-74.

“Gusto pa ko moaway pero giundang na man. Wala ko sakiti sa iyang (Alcaraz) kumo. Naglisud lang gyud ko gamay tungod sa cut.”

Sa undercard, miagi sab og kalisud si Jimrex ‘Executioner’ Jaca (40-8, 22KOs) sa wala pa niya makuha ang ‘unanimous decision’ nga kadaugan batok ni Mexican Pablo Lugo Montiel (21-6, 17KOs). 

Kompiyansa kaayo si Jaca hinungdan nga naigo siya sa kusog nga hook ni Montiel sa fourth round hinungdan sa iyang pagkatumba. 

Hinuon gamit iyang kasinatian, si Jaca nakasugakod ug mao na ang mikontrolar  sa away diin siya mitigom og puntos gamit iyang counter-punching. Human sa away si Jaca midaog sa scorecards 78-73, 78-73, 77-74.

Nangayo lang usab og 58 segundos ang Dubai-based Pinoy boxer nga si Larry Abarra (4-0, 3KOs) aron idispatsar ang Indonesian nga si Tony Arema (3-5, 3KOs).   (BANAT NEWS)