Lig-ong mga koponan nagmangtas
CEBU, Philippines - Tulo ka duwa sa juniors division ang nahimong one-sided tungod kay ang mga lig-on nga teams nga Cebu Eastern College Dragons, University of San Jose-Recoletos Baby Jaguars ug University of San Carlos Baby Warriors pulos milubong sa ilang tagsa-tagsa ka karibal kagahapon sa 15th season sa Cebu Schools Athletic Foundation, Inc. (ESAFI) didto sa Cebu Coliseum.
Sa pasiunang duwa, ang Dragons yanong midaog batok sa mas gagmay nga Don Bosco Technology Center Junior Greywolves, 60-42 samtang impresibong kadaugan ang gihimo sa Baby Jaguars dihang ila sab nga gilubong ang University of the Visayas Baby Lancers, 65-43 ug ang Baby Warriors midaog sa University of Cebu Junior Webmasters, 76-67.
Ang Dragons ug ang Baby Warriors pareho nang adunay 2-0 nga baraha, samtang ang Baby Jaguars ug ang Baby Lancers nagtabla sab sa 1-1.
Ang gamitoy’ng point guard sa Dragons nga si Vince Ryan Tecson mihimo’g 16 puntos ug si Anfernee Roa midugang og 15 puntos alang sa Dragons, samtang si Lance Lim ang bugtong player sa DBTC nga nakahimo’g double figures sa iyang 21 puntos.
Sa laing bahin, silang Joshua Renz Ortiz ug John Kirk Gonzaga maoy nangu sa Baby Jaguars sa ilang 15 ug 12 puntos matag usa.
Ang Baby Lancers gipangulohan ni Raul ‘Jancork’ Cabahug sa iyang 13 puntos , gisundan sa rookie guard nga si Jim Paul Amistoso nga adunay 10 puntos.
Sa ilang bahin, ang Baby Warriors gipangulohan sab ni Jan Joshe Laurente, kinsa miposa’g 18 puntos, samtang si Aleikhem Chavez miamot og 11 puntos Silang Frolian Mangubat ug John Bryl Cuyos maoy nangu sa Junior Webmasters sa ilang 14 ug 13 puntos matag usa, si Jason Florence Abejo mitampo’g 11 puntos. (BANAT NEWS)
- Latest
