Geobert Merchandise, 2-0 na sa 5TH CBBL tournament
CEBU, Philippines - Ang Geobert Merchandise mipilde sa Sto. Niño, 91-87 aron magsolo sa bracket A sa 5th CBBL basketball tounament niadtong Sabado didto sa Brgy. Pulpogan gym sa Consolacion.
Sila si Numuel Sausa ug Cyril Sabellana nagkumboya’g 35 puntos aron pangulohan ang balanseng opensa sa Geobert Merchandise nga nagbitbit na karon og 3-0 nga baraha.
Ang Yokoks Gym gipangulohan sab ni Babyjun Abinales nga mialsa og 31 puntos, gisundan ni Yer Tuburan sa iyang 21 puntos ug Rylie Reyes nga adunay 15 puntos.
Sa pasiunang duwa, ang Radisson nakaeskapo bitbit ang 67-64 nga kadaugan batok sa Sto. Niño.
Gipangulohan ni Kenneth Abrantes ang kadaugan pinaagi sa iyang 23 puntos, samtang si Ronald Somosot miamot og 15 puntos alang sa Radisson nga adunay 2-1 ubos sa bracket B.
Tulo ka players sa Sto. Niño ang mihimo’g double figures sa pagpangulo ni Junly Padayogdog nga adunay 16 puntos.
Si Raymund Owatan mitimang og 14 puntos, samtang si Erik Magale mitikdol og 12 puntos.
Ang mga duwa gidumala ni league commissioner Eduard Escorial. (BANAT PALARO)
- Latest
