Dumanjug mo-host triathlon event
CEBU, Philippines - Human sa lungsod sa Sta. Fe, isla sa Bantayan, ang aksiyon sa 2015 Team Triathlon Championships mobalhin ngadto sa Dumanjug sa habagatang bahin sa Sugbo alang sa ikaduhang leg karong Septiyembre 26.
Mao kini ang labing unang higayon nga mo-host og triathlon event ang Dumanjug sa tinguha nga madugangan og kasadya ang selebrasyon sa tinuig nilang piyesta.
Matud pa ni Benjo Gimenez sa Sugbutriathlon, ang nagpasiugda sa maong karera, nga dugay nang nagtinguha ang Dumanjug nga mo-host og triathlon apan nahatagan lamang kini og katumanan human si acting mayor Edgar Gica mihatag sa iyang suporta niini.
Ang maong lumba maglangkob og standard ug sprint distance.
Nagkadaiyang age groups ang kumbatihan sa standard distance, samtang ang sprint race dunay men ug women’s open division.
Kadtong gusto mosalmot mahimong magparehistro diha sa The Brick sa Cebu IT Park o sa buhatan sa SATS atbang sa Gaisano Grand Mall.
Ang entry fee sa mga ‘early birds’ kon kadtong magparehistro sugod karong adlawa hangtod sa Agosto 26 nagkantidad lamang og P2,000 sa standard, P1,800 sa sprint ug P1,500 matag atleta sa relay event. Kadtong malangan og parehistro, modugang na sila og P500.
Ganting salapi ang ihatag ngadto sa top 3 finishers sa standard distance, samtang mga medalya ang isab-it sa mga mananaog sa age group ug sprint race. (BANAT PALARO)
- Latest
