Knak-awtay sa Dubai

DUBAI –– Si ‘Prince’ Albert  Pagara  maoy  gitan-aw  nga kaugmaon sa Philippine boxing ug  gumikan  niini, misaad siya nga mohimo’g impresibong kadaugan sa labing una niyang away sa gawas sa nasud.

Si Pagara (23-0, 16KOs) manalipod sa iyang  IBF Intercontinental junior featherweight title batok ni veteran Mexican knockout artist  Jesus ‘Chito’ Rios (31-7, 25KOs) sa main event sa “Pinoy Pride 32: Duel in Dubai 2” karong gabii didto sa Dubai World Trade Center sa Dubai, United Arab Emirates.

"Knockout gyud akong tinguha ani pero dili ko mokompiyansa kay kusog pud ni Mehikanoha, pasensiya lang gyud ako puhonan ani awaya,”  matud pa ni Pagara.

“Nindot ni awaya kay mao ni first away nako abroad ug naa ang suporta sa akong mga kababayan,” dugang pa ni Pagara.

Hinuon, si Rios wala na’y paglaum nga makuha niya ang bakus ni Pagara kay pakyas kini  pagkuha sa gitakdang 122 pound limit. Atol sa official weigh-in si Rios mitimbang 124 lbs., samtang si Pagara may gibug-aton nga  121 lbs.

Bisan og gitangtangan na siya og katungod nga mailog ang bakus ni Pagara, si Rios mibahad gihapon nga patumbahon si Pagara.

Gawas sa pagdepensa sa iyang bakus, si ALA Promotions President and CEO Michael Aldeguer  miingon nga isugal sab ni Pagara ang iyang kahigayonan sa Estados Unidos. Kun modaog, si Pagara segurado na nga mobida sa labing unang fight card sa ALA Promotions sa Estados Unidos karong Oktubre didto sa Stubhub Center sa Carson City, California.

“A lot is at stake for Albert for this one and aside from a slot in the US fight card, a win will also boost his ranking as he nears for a dream world title shot,” matud pa ni Aldeguer. “He is young and we can say that he is the future (of Philippine boxing) so this is a very significant fight for him.”

Sa supporting main event ang maguwang ni Albert nga si Jason ‘El Niño’ Pagara (35-2, 22KOs) mopakita sab sa iyang abilidad  batok sa laing Mehikano nga si  Ramiro ‘Xixime’ Alcaraz (15-4, 9KOs) sa 10-round, non-title bout.

“Espesyal ning awaya para nako kay moaway ko sa Dubai kuyog akong igsuon. Siyempre gusto ko nga unang modaog pinaagi sa knockout aron usab makahatag ko niya og kadasig kun siya na ang sunod moaway.”

Sa undercard ning maong boxing card nga gipasiugdahan sa ALA Promotions ug ABS-CBN Sports, ang kanhi two-time regional champion nga si  Jimrex ‘Executioner’ Jaca (39-8, 22KOs), makigsangka ni Mexican Pablo Lugo Montiel (21-5, 17KOs.). Moaway sab ang US-based Filipino boxer nga si Larry Abarra (3-0, 2KOs) batok ni Indonesian   Tony Arema (3-4, 6KOs). (BANAT PALARO)