Fusion sa finals, ACREEX buhi pa sa Davies Cup

CEBU, Philippines - Ang Team Fusion miabante sa finals human gipilde ang Polyfloor, 75-65, sa Architects+Engineers Basketball Association’s 1st Davies Paints Cup niadtong Domingo didto sa Cebu Eastern College gym.

Ang Fusion magpaabot pa hinuon sa ilang makontra sa kampiyonato human ang Acreex nakaangkon og laing kinabuhi pinaagi sa pagpakaging sa Stay Clean, 88-83. 

Ang Acreex ug Stay Clean magtigi pag-usab karong Domingo diin ang modaog maoy makaangkon og katungod nga moharong sa Fusion sa best-of-three finals.

Si Ed Bonphyl Macasling miratsada og 35 puntos alang sa Fusion nga miposte og nuybe puntos nga bentaha human sa first half, 35-36. 

Ang Polyfloor milusad og 25-16 nga rally sa ikatulong kuwarter, apan ang Fusion mitak-op sa duwa pinaagi sa 25-15 rally aron pagkulit og 10 puntos nga kadaugan.

Sa laing duwa, ang Acreex nagsandig sa balanseng opensa aron pagpakaging sa Stay Clean. Mao sab kini ang hinungdan nganong wala kaugpo ang Stay Clean bisan pa man og mipabuto og 44 puntos ang star player niining si Michael Cinco.

Upat ka batos sa Acreex ang milansang og double figures nga gipangulohan ni Richard Badayos nga adunay 17 puntos. Si Erik Valleser miamot og 16 puntos, samtang sila si Jun Villacorta ug Parcon nagkumboya’g 29 puntos. (BANAT NEWS)