Chiongbian nangu sa cebuano winners sa Alaska Ironkids

CEBU, Philippines - Ang sakop sa Philippine triathlon development team nga si Yuan Chiongbian, mikabkab og bulawang medalya aron pagpangu sa mga Sugbuanong mananaog sa Alaska IronKids kagahapon didto sa Shangri-La’s Mactan Resort and Spa sa dakbayan sa Lapu-Lapu.

Mao kadto ang ikatulo ug katapusan niyang pagsalmot sa boys 13-14 age group, apan gipaneguro ni Chiongbian nga magbilin siya og halandumon nga marka human giangkon ang titulo. Iyang gitapos ang karera nga naglangkob og 400-meter swim, 12K bike ug 3K run sud sa oras nga 42 minutos ug 50.7 segundos.

Mitapos sa halayo nga ikaduhang dapit si Lucian Antonio Alejo sa oras nga 45:51.4, samtang si John Caleb Barlin maoy third sa oras nga 45:53.2.

Ang managsuong Yu nga sila si Justin ug Catherine misidlak sab. Si Justin nakabira og gold sa boys  9-10 class sa oras nga 27 minutos ug 43.4 segundos human sa lumba nga naglakip og 200m swim, 6K bike ug 1.5K run.

Ang iyang igsuon nga si Catherine nakamugna og dakung surprisa human siya mitapos sa ikaduhang dapit sunod ni Tara Borlain, usa sa labing lig-on ug gikahadlokan nga entrante sa Alaska IronKids ubos sa girls 11-12 bracket.

Si Borlain maoy nanghawod sa oras nga 34 minutos ug 34 segundos, apan si Yu impresibo nga mitapos sa ikaduha sa oras nga 35:54.1.

Lain pang Cebuana nga si Raven Faith Alcoseba ang mipakita sab og maayong labok sa labing una niyang pagsalmot sa triathlon aron pagpahiluna sa ikatulong puwesto sunod nilang Borlain ug Yu. Mirehistro siya sa oras nga 37:07.08, nga kasarangan na kaayo sa usa ka first timer.

Ang mga kauban ni Alcoseba gikan sa dakbayan sa Talisay miangkon sab sa  unang duha ka puwesto sa mixed relay classes kortesiya nilang Jana Cañete, Fresh Loraine Seguerra ug Justin Hermosa nga maoy naghari sa 6-9 class human gipilde ang ilang teammates nga sila si Fiona Alcoseba, Dave Fernandez ug Saavik Scheuer.

Sa 10-14 relay, gipakyaw sab sa mga Sugbuanon ang  nag-unang tulo ka puwesto. Ang mga Talisaynon nga sila si Sam Daniel Aquino, Renz Curbin ug Earnest Racaza maoy milabni sa gold, samtang ang ilang teammates nga si Franco Rodriguez, Ylana Scheur ug Nikkalyn Gonzalez maoy mibira sa  silver. Ang Team GKA nga gitimon nilang Gavynne Alcantara, Kenji Co ug Alan Choachuy maoy milabnot sa bronze. (BANAT NEWS)