20th SHAABAA buksan ugma sa SHS-ADC Canduman Campus

CEBU, Philippines - Nagkadugay, nagkalami. Gawas pa  niana, nagkakusog ug nagkalig-on sab ang mga teams ug ingon man ang panaghigalaay sa sakop sa Sacred Heart Ateneo Alumni Basketball Athletic Association  nga mobukas sa ika-20 nga season ugma didto sa Magis Eagles Arena sa Brgy. Canduman, dakbayan sa Mandaue.

Dunay 13 ka teams ang mosalmot sa maong torneyo nga maoy longest-running alumni tournament dinhi sa Sugbo. Gibahin kini ngadto sa duha  ka dibisyon. 

Pito ka teams ang sakop sa Division A pinangulohan sa defending champion Goldberry Suites nga karon Petron Goldberry uban sa Bayfront Hotel Cebu, Cebu Landmasters, Chick@Phil-Basic, Gaisano Capital, Filmon Prince Medallion ug RDAK Stallions.

Mangu sa Division B mao ang RDAK Transporters uban sa AutoLAB, Caltex Delo 90, Dynamic Power, Filmon Finishing Studio ug White Gold Club. 

Atol sa usa ka presscon kagahapon didto sa Acacia Room sa Cebu Country Club, ang board  member sa SHAABAA nga si Franco Soberano nagkanayon nga mas nindot ang umaabot nga torneyo tungod kay bisan og nagkadiyotay ang mga teams, nagkalig-on kini tungod sa tinguha sa ubang team nga mahimong competitive.

Gani daghang mga batan-on nga alumni nga gusto kaayong moduwa sa SHAABAA. (BANAT NEWS)