Alaska Ironkids mosikad na karon

CEBU, Philippines - Ang mga sumusulbong nga bitoon sa Ironman mopakita na sa ilang abilidad alang sa final leg sa 2015 Alaska Ironkids karong adlawa didto sa Shangri-La’s Mactan Resort and Spa, dakbayan sa Lapu-Lapu.

Miabot ngadto sa 174 ka mga partisipante nga gipangulohan ni Tara Borlain ang mobanat sa junior version sa Ironman Philippines. Si Borlain ug Juan Banqued, ang top contender sa boys division, naglaraw nga haruson ang mga tropeyo karong tuiga  nga edisyon sa Alaska IronKids human ilang gidominar ang tagsa-tagsa nila ka kategoriya ubos sa 11-12 age group sa duha ka aquathlon ug sa unang IronKids event niadtong Marso didto sa Subic.

Nanghinaut sab si Tara nga makampiyon ning higayona human gihikawan sa korona sa mismo niyang maguwang nga si Samantha sa miaging tuig. Lain pa nilang igsuon nga si Franchezka Borlain nga nangambisyon nga manghawod sa 6-8 class, apan mag-agi siya og malisud nga hagit batok sa mga pambato sa Sugbo nga silang Dhexia Myle Galo ug Savvy Chiongbian.

Mosalmot sab ang maguwang ni Savvy nga si Yua Chiongbian human sa malampuson niyang   kampanya sa Singapore International Triathlon sa miaging semana.

Sila si Justin Yu, Lorraine Hann ug uban pang mga batan-ong triathletes ubos ni coach Love Casidsid nagpanikad na sab nga mobanat batok sa mga bisitang atleta sa nagkadaiyang kategoriya nga naglangkob sa 6-8, 9-10,11-12 ug 13-14 age groups sa boys ug girls division. Duna sa’y relay event alang sa 6-10 ug 11-14 age groups. (BANAT NEWS)