Mayweather moretiro human sa September fight
CEBU, Philippines – Ang sunod nga away ni Floyd Mayweather Jr. karong Septiyembre mao na’y iyang katapusan.
Mao kini ang lagmit nga mahitabo human gikompirma ni Stephen Espinoza, ang executive vice president ug general manager sa Showtime Sports nga mao ang dunay katungod pagpasalida sa mga away ni Mayweather.
Ang wala pa’y pildeng Amerikanong kampiyon wala na’y intensiyon nga lugwayan pa ang iyang kontrata uban sa maong network.
Segun sa taho ni Rick Reeno sa boxingscene.com, si Espinoza nagkanayon nga si Mayweather desidido na gyud nga moretiro sa natad sa pamuksing.
Gikataho nga si Mayweather makigharong batok ni two-time welterweight champion Andre Berto sa sunod niya nga away karong Septiyembre 12 didto sa MGM Grand sa Las Vegas. Naglaraw ang pound-for-pound king nga moretiro bawon ang wala’y tatsang 49-0 record, apan naputos sa kontrobersiya niyang karera.
Apan bisan pa man og makahukom nga moretiro, wala sirad-i sa hingpit ni Espinoza ang pultahan sa posibleng pagbalik ni Mayweather.
Kahinumduman nga si Mayweather miansunsiyo nga siya moretiro human gipalukapa si Ricky Hatton niadtong tuig 2007, apan human sa 21 ka bulan nga pahuway mibalik siya aron sangkaon si Juan Manuel Marquez. (BANAT NEWS)
- Latest
