Nietes maoy ‘Athlete of the year’
CEBU, Philippines – Si world boxing champion Donnie ‘Ahas’ Nietes maoy gitahod isip “Athlete of the Year” sa 33rd Sportswriters Association of Cebu-San Miguel Brewery (SAC-SMB) All-Cebu Sports Awards kagahapong adlawa diha sa Ayala Activity Center.
“It’s been an amazing run for Donnie, from being a janitor to become a legendary hall-of-fame athlete is beyond words for the ALA Gym and ALA Promotions to be part of it. It’s a journey that one could only dream of, but if you work for it nothing is impossible,” matud pa ni ALA Promotions President ug CEO Michael Aldeguer, kinsa usa sa mga nagtabang paghulma sa mabulokon nga karera ni Nietes.
Ang 32-anyos nga si Nietes maoy gitunolan sa labing taas nga pasidungog sa SAC gumikan sa impresibo niining kampanya sa tuig 2014. Iyang gipakamang ang Meksikanong si Moises Fuentes sa ikasiyam nga hugna atol sa ilang rematch aron pagdepensa sa iyang WBO light flyweight title didto sa SM Mall of Asia Arena
Unom ka bulan ang milabay, nagkabangis pa si Nietes human gipalukapa ang laing Meksikano nga si Carlos Velarde sa ikapitong hugna aron depensaan na sab ang iyang bakus.
Sa sayong bahin ning tuiga, si Nietes mikulit sa iyang pangan sa libro sa kasaysayan human gibuak ang rekord ni anhing Gabriel ‘Flash’ Elorde isip labing dugay nga Pinoy’ng boksidor nga naghari isip world boxing champion.
“I have this saying that I have always held on to, ‘Dream… Believe… Achieve…’ And I think this is what defines Donnie as an athlete. He believes in himself that nothing is impossible if you work hard and keep your feet on the ground,” dugang pa ni Aldeguer agi’g pagdayeg sa usa sa labing masidlakon nga bitoon sa ALA Stable.
Dili na gyud kapugngan pa ang pagsaka ni Nietes sa bukid sa kalampusan. Niadto lamang Sabado sa gabii didto sa Smart Araneta Coliseum sa dakbayan sa Quezon, iyang napanalipdan ang duha niya ka bakus isip WBO ug RING light flyweight champion human gipasurender pagkahuman sa ikasiyam nga hugna ang Meksikanong si Gilberto Parra.
Kadiyot rang mopahuway si Nietes gumikan kay mangandam na man sab siya dayon sa umaabot niyang depensa batok ni kanhi WBO ug International Boxing Federation minimumweight champion Francisco Rodriguez karong Hulyo 4 diha sa Waterfront-Cebu City Hotel and Casino.
Gikan sa ubos niyang sinugdanan isip tigsilhig sa sawog ug tiglimpiyo sa mga hugaw sa ALA Gym, si Nietes misulbong isip usa sa labing banggiitan nga Pinoy’ng boksidor sa kasaysayan. Mao nang angayan lamang siya nga gibayaw sa SAC ngadto sa altar sa kadungganan. (BANAT NEWS)
- Latest
