Flores, Kidlat daog sa CEPCA monthly tourney

CEBU, Philippines -  Sila si Rey Flores ug Jun Kidlat maoy naghari sa March edition sa Cebu Executives and Professionals Chess Association (CEPCA) monthly tournament niadtong Domingo diha sa Handuraw Pizza sa  dalan Gorordo, ning siyudad.

Si Flores maoy nanghawod sa group A alang sa top-rated players human mitali og 5.0 puntos. Sila si Peterson Sia ug Felix Shaun Balbona pulos mikulit og 3.5 puntos, apan si Sia maoy mipahiluna sa ikaduhang puwesto tungod sa mas taas niining tie-breaker.

Si CEPCA sports committee chairman Jun Olis nagkanayon nga si Sia awtomatik nga maoy March qualifier sa group A gumikan kay si Flores nakaangkon na man og luna sa grand finals human gidominar ang January leg.

Sa iyang bahin, si Kidlat mipakyaw og daog sa lima niya ka duwa aron pagsakmit sa  titulo  sa  group B.  Sila si Andrew Balbona ug Queenie Cablao parehong mikulit og 4.0 puntos, apan si Balbona maoy nalandig sa ikaduhang dapit gumikan kay nakabentaha  kini  sa  tie-break output.

  Sa pagka karon, ang mga finalists mao sila si Rey Flores, Arnold Cadiz ug Peterson Sia sa group A ug sila si Regelito Hortelano, Ruel Hortelano ug Jun Kidlat sa group B.

Mag-engkuwentro sila pag-usab sa ‘Battle of Champions’ karong Disyembre. (BANAT NEWS)