Builder’s run 2 gitakda sa Mayo 31
CEBU, Philippines – Pormal na nga gilusad sa Cebu Home Builders Centre ang ilang “Builder’s Run 2“ atol sa press conference kagahapon didto sa Chika-an restaurant sa Parkmall grounds sa dakbayan sa Mandaue.
Ang mga Sugbuanong runners nga mosalmot makahigayon na sab sa pagtabang sa mga kabus ug sa nanginahanglan pinaagi sa “Builder’s Run 2” nga mosikad karong Mayo 31 diha sa Parkmall dakbayan sa Mandaue.
Ang kita sa maong kalihukan gamiton aron itukod og mga balay ubos sa Gawad Kalinga Village didto sa Kinuguitan, Misamis Oriental, mga 80 ka kilometro ang gilay-on gikan sa siyudad sa Cagayan de Oro.
Ang Cebu Home and Builders Centre, nga maoy nagpasiugda sa maong event, mipili sa maong lugar nga maoy ilang benepisyaryo gumikan kay duol man kini sa dughan sa ilang Chief Operating Officer nga si James Co.
Si Co ug ang iyang kapikas nga si Jewel maoy nangunay paglusad sa maong kalihukan. Ilang gipili ang maong adlaw agi’g pagsikad sa selebrasyon sa ika-13 nilang anibersaryo.
Mga kategoriya nga kumbatihan mao ang 3K, 5K, 10K ug 16K. May espesyal sab nga dibisyon alang sa mga kawani sa CHBC. Ang rehistrasyon nagkantidad og P350 sa 3K ug 5K, P550 sa 10K, ug P650 sa 16K apil na niini ang singlets ug post-race refreshments. Ang 200 ka finishers sa 10K ug first 300 sa 16K sab-itan og medalya. Samtang ang top three runners sa 5K, top five sa 10K ug ang top 10 sa 16K makadawat og ganting salapi ug gift certificates.
Ang entry forms makuha sa tanang sangang tindahan sa Cebu Home and Builders Centre. (BANAT NEWS)
- Latest
