CCSC mopahigayon og referees seminar

CEBU, Philippines - Sa tuyo nga molambo ang kalidad sa basketball officiating dinhi sa Sugbo,  si Cebu City Sports Commission (CCSC) commissioner Lorenzo ‘Chao’ Sy mopahigayon og libreng officiating seminar ngadto sa buot mahimong mga referees.

Usa kini ka proyekto sa CCSC  ug sa University of Cebu (UC) pinaagi sa ilang vice chancellor ug Dean sa UC College of Law nga si Atty. Baldomero C. Estenzo.

Hinuon, dili sayon mahimong referee kay daghan pa  kini’g maagian nga mga pagsuway kalabot niini ang mga lectures ug examinations aron mahimong kwalipikado. Ang katapusang hugna mao ang practical application seminar nga pagadumalaon ni FIBA accredited International Referee ug PBA referee consultant Romy Guevarra.

Kinahanglan nga college level ang mo-apply.

Ang duha ka adlaw nga seminar gikatakda  sa Abril 18 ug 19. Sundan kini sa written ug oral examinations sa Abril 25.  Ang practical application pagahimuon sa Mayo 2 ug 3.

Si Sy nagkanayon nga iyang nabantayan nga kuwang pa ang matang sa officiating sa atong mga local referees mao nga atol sa CESAFI finals, ang taga- Manila maoy padaganon sa duwa.

Ang application forms adto makuha sa front desk sa Hotel Fortuna.