Nataghapan

CEBU, Philippines -  Nakataghap ang New York Knicks dihang ilang gipilde ang defending champion San Antonio Spurs  sa iskor nga 104-100  sa overtime sa National Basketball Association kagahapon didto sa Madison Square Garden sa New York City.

Si Alexey Shved mihagpat og 21 puntos aron mangu sa  Knicks, ang team nga adunay ubos nga rekord  (14-53), samtang ang Spurs adunay 41-25 nga baraha.

Ang bati nga passing ug ngil-ad nga shooting  sa overtime maoy nakatampo sa kapildihan sa Spurs.

Ang Knicks maoy labing unang team sa NBA nga adunay winning percentage ubos sa .200 karon nga season nga mipilde og defending champions. Ang rookie nga si Langston  Galloway mihimo’g career-high 22 puntos alang sa Knicks, kinsa igo lang mitugot sa Spurs ngadto sa usa ka basket sa overtime. Si Lou Amundson mitampo’g 12 puntos ug mihimo’g  career-high 17 ka rebounds.

Natapik ni Shved ang pasa ni Tim Duncan nga alang unta ngadto kang Kawhi Leonard nga posible  untang tablahon  ang duwa.

Si Tony Parker maoy nangu sa Spurs sa iyang 21 puntos, samtang si Duncan miamot og 17 puntos. Si Leonard mihipos og 13 puntos, apan igo lang siya mihimo’g 3 of 9 gikan sa field.

Ang Spurs nagduwa nga wala si Manu Ginobili, kinsa adunay piang sa tuong tikod.

Sa laing mga duwa, ang Detroit Piston mipilde sa Memphis Grizzlies sa iskor nga 105-95, ang New Orleans Pelicans nakaipsot sa Milwaukee Bucks, 85-84.

Ang Houston Rockets mipulbos sa Orlando Magic, 107-94 ug ang Los Angeles Clippers mibuntog sa Charlotte Hornets. (BANAT NEWS)