Sugbuanong eskrimadors mokumbati sa Amerika

CEBU, Philippines – Walo ka Sugbuanong eskrimadors ug unom ka mga opisyales ang molarga sa Amerika karong adlawa alang sa 5th Doce Pares World Championships.

Ang koponan  pangulohan ni Engr. Michael Cañete,  kinsa mao sab ang presidente sa WEKAF (World Eskrima Kali Arnis Federation) Philippines ug  Executive Director Gerald Cañete, nga maoy mipahibawo sa pangan sa mga players.

Kini naglangkob nilang Harry Talledo, Gerardo Rusiana, Joseph Burt Cañete, Jonas Pableo, Thadd Kholenn Cañete, Mario Palazuelo, Christian Michael Cañete ug ang 12-anyos nga si Joshua Miguel Cañete, nga mopakita’g aksiyon sa boys category.

Mokuyog kanila mao sila si Grandmasters Andres ‘Kano’ Cañete ug Felix ‘Tenciong’ Gutang. Gawas nga mga dinapit sa maong torneyo, mopahigayon sab sila og seminar-workshop sa katapusang adlaw sa maong upat ka adlaw nga kalihukan.

Si Supreme Grandmaster Dionisio Cañete, ang presidente  sa Doce Pares, mouban sab sa grupo ingon man si Roberto Cavan, ang tsirman sa International Membership and Affiliation sa nabaniog nga eskrima organization sa tibuok kalibotan.

Ang kampiyonato nga adto himuon sa Jose Marti Academy Gym sa Union City, New Jersey, pagasalmotan sa kapin sa 20 ka nasud apil na niini ang United Kingdom, Germany, Australia, Hungary, Italy ug Mexico ug uban pa.

Mipasiugda sa maong kompetisyon mao ang US Doce Pares ubos sa liderato ni Grandmaster Arnulfo ‘Dong’ Cuesta, usa ka Sugbuanon nga atua na karon magbasi sa Amerika. (BANAT NEWS)