Dancesport Team Cebu nanghakot og medalya
CEBU, Philippines – Mihakot og 13 ka bulawan, walo ka silver ug unom ka bronze medals ang Dancesport-Team Cebu sa DSCPI 1st Quarterly Ranking and Competition niadtong miaging adlaw didto sa Philsport Multi-purpose Arena sa Manila.
Ang Team Cebu midominar sa 13 ka kategoriya sa maong kompetisyon sa pagpangulo ni Charlea ug Ronnie Vergara sa professional class.
Ang tandem nila ni Kelly Diluvio ug Eijen Lidon midaog sa latin grade gold, samtang sila si Kevin Diluvio ug Jam Flores maoy nakabulawan sa supreme grade B.
Midagit og upat ka golds sila si John Leyson ug Selene Rendon sa latin ug standard juvenile C, juvenile A latin ug modern standard division.
Ang directress sa Dancesport Team Cebu City nga si Eleanor Hayco wala usab nagpauwahi human siya midominar sa senior A class uban si Jimmy Noel alang sa gold. Si Hayco ug Wilbert Aunzo mao usab ang naka-silver sa teacher-student-2A class.
Ang DTCC miharus sa mga medalya sa latin TS-1C sa pagpangulo nila ni Deluvio ug Flores. Sila si James Bryan ug Christine Camacho naka-double gold usab sa latin ug standard youth C class.
Ang tandem nila ni Simon Asuque ug Rylun Jhea Romeo mao ang misakmit sa bulawan ug silver sa junior C standard uban ang bronze medal sa latin junior C, samtang si Zijane Troy ug Zijane Tracey Villarta nanghawud sa standard young A division.
Miangkon sa premiere latin A bronze medal sila si Ansel Estellore ug Mary Desiree Seraga, samtang sila si Jake Emmanuel Corro ug Anndreah Kier Capangpangan mituhog og tulo ka silvers sa Latin, standard junior A ug latin junior C. Miamot og bronze medal sila si Romeo Jay Cialbo ug Mae Pabuaya sa standard TS-1C. (BANAT NEWS)
- Latest
