Unom ka teams sa Summer League
CEBU, Philippines - Unom ka teams ang mikumpirmar sa ilang partisipasyon sa Cebu City Mayor’s Cup Summer League basketball tournament diha sa Cebu City Sports Institute gym sa barangay Sawang Calero, ning dakbayan.
Gipasiugdahan ni CCSC commissioner Lorenzo ‘Chao’ Sy uban sa suporta sa Cebu City Sports Commission, ang umaabot nga torneyo walay premyo tungod kay matud pa ni Sy nga ang katuyoan sa maong torneyo mao lang ang pagtabang sa mga players nga molambo ug mabaid ang ilang abilidad ug ingon man alang sa exposure niadtong mga players nga moduwa sa umaabot nga 15th season sa Cebu Schools Athletic Foundation, Inc. (CESAFI) unya sa Agosto.
Ang unom ka teams nga moapil mao ang University of San Carlos (USC) Warriors, University of Cebu (UC) Webmasters ug Salazar Institute of Technology (SIT) Skyblazers ug tulo sab ka commercial teams nga naglakip sa Abrenica, Jomangs ug RMA Forwarders.
Matag team mahimong mokuha og usa ka import isip re-enforcement.
Ang top two teams human sa eliminations moabante sa semifinals, samtang laing upat ka teams mopailawom og playoffs diin ang no. 3 ug no. 4 teams adunay twice-to-beat advantage batok sa no. 5 ug sa no. 6 teams.
Sa semifinals, ang no. 1 team makigsangka batok sa no. 4 samtang ang no. 2 makigbatok sa no. 3 diin ang top two seeds makaangkon sab og twice-to-beat advantage.
Ang finals ipaagi sa best-of-three series.
Ang mga duwa himuon matag adlaw’ng Biyernes ug Sabado.
- Latest
