Alyssa Valdez back-to-back MVP ng UAAP vball

MANILA, Philippines – Tatlong individual awards ang hinakot ng Ateneo de Manila University superstar Alyssa Valdez sa UAAP season 77 women's volleyball tournament.

Sa ikalawang sunod na pagkakataon ay kinilalang muli ang kagalingan ni Valdez bilang most valuable player, habang nasungkit din niya ang Best Scorer at Best Server awards.

Si Valdez ang nasa likod ng 14-0 sweep ng dalawang round na eliminations ng Lady Eagle upang makuha ang outright Finals berth na may thrice-to-beat advantage.

Nitong Miyerkules lamang ay hinatak nila sa 15-straight victories ang kanilang record matapos durugin ang La Salle sa game 1 ng finals, kaya naman isang panalo na lamang ang kanilang kailangan upang makopo rin ang ikalawang sunod na kampeonato.

Samantala, bukod kay Valdez ay kinilala rin sina EJ Laure ng University of Santo Tomas at Kathleen Arado ng University of the East bilang Rookies of the Year.

Hinirang naman bilang Best Spiker si Jaja Santiago ng National University at Best Blocker si Ria Meneses ng UST.

Best Digger, Best Setter at Best Reciever naman sina Tin Agno ng Far Eastern University, Jia Morado at Denden Lazaro ng Ateneo, ayon sa pagkakasunod.

Pormal na pararangalan ang mga nagningning na atleta bukas bago ang game 2 ng UAAP finals.