Casimero naghinam-hinam na
CEBU, Philippines – Naghinam-hinam na karon si kanhi IBF light flyweight champion Johnriel ‘Cuadro Alas’ Casimero sa iyang kahigayonan nga makaaway og balik alang sa world title.
Isip mandatory challenger sa IBF flyweight division, si Casimero mao ang adunay katungod nga mohagit ni Thai champion Amnat Ruenroeng (15-0, 5KOs), nga lab-as pa kaayong nakadepensa sa iyang IBF title human gipilde si Zou Shiming (6-1, 1 KO) pinaagi sa unanimous decision niadtong Sabado sa gabii didto sa Cotai Arena sa The Venetian sa Macau.
Segun sa lagda sa IBF, si Ruenroeng gikinahanglan nga modepensa sunod sa iyang korona batok ni Casimero sud sa 90 ka adlaw.
Si Casimero ug ang higala niining si ‘Marvelous’ Marvin Sonsona atua karon nagbansay-bansay sa Las Vegas, nangandam sa dakung hagit nga nagpaabot sa tagsa-tagsa nila ka mga karera.
Ang 24-anyos nga si Casimero nakaangkon og mandatory title shot isip No.1 contender sa IBF human gipalukapa si IBF International champion Armando ‘Cobra’ Santos sud lamang sa duha ka hugna niadtong Disyembre 14 sa miaging tuig didto sa Hidalgo, Mexico. (BANAT NEWS)
- Latest
