Cebu City Niños hawod sa Mayor Rama swimfest

CEBU, Philippines -  Misidlak na sab ang Cebu City Niños sa natad sa linangoyay aron dominahon ang 1st Mayor Michael Rama Cup Invitational Age-Group Swimfest niadtong weekend diha sa Cebu City Sports Center.
Human mangharos sa Central Visayas Regional Athletic Association (CVIRAA) Meet, ang Niños ubos ni coach Rolando Alvarez  wala  batia’g  kaluya human kini mokabkab og 47 gold, 45 silver ug 31 bronze medals aron sakmiton ang titulo sa maong duha ka adlaw nga kompetisyon bitbit ang kinatibuk-ang 1,367 puntos.
Ang Silliman University (SU) Red Stallions sa dakbayan sa Dumaguete nabiyaan og maayo sa ikaduhang dapit dala ang 576 puntos sa nahakot niining 13 ka golds, lima ka silvers ug 15 ka bronzes, samtang ang University of Bohol (UB) Rockets maoy mipahiluna sa ikatulong puwesto  nga adunay 415 puntos gikan sa ilang 10 ka golds, 12 ka silvers ug 12 sab ka bronzes.
  Gawas sa ilang kalampusan, upat ka sakop sa TCC ang gipasidunggan sab nga most outstanding swimmer, kini naglakip ni  Michael Ichiro Kong (15-17 age group), Quintin Sabalandre (6-under) ug Mike Gabrielle de la Serna ug Karen Mae Indaya (13-15).  (BANAT NEWS)