Jagape nagmadaugon sa ‘bakbakan sa sugbo’

CEBU, Philippines – Gitagalan lang sa duha ka hugna sa Bol-anong si Dodong ‘Tiger’ Jagape  ang kontra niining si Dan ‘Dagmals’ Cotejo sa Team Bagwis sa main event sa kickboxing sa  “Bakbakan sa Sugbo” sa miaging adlaw diha sa Cebu Sports Institute (CSI) sa Barangay San Nicolas, ning siyudad.

Walay kukahadlok nga nagsinukliay og  mga sukmag ug patid ang duha ka fighters, apan ang 39-anyos nga si Jagape sa Bohol Top Team maoy  nakabentaha human siya makapasud og mga kusog nga kinumo sa ulo ug lawas ni Cotejo, kinsa wala na mibarog sa iyang korner sa dayon untang sugod sa second round.

Ang teammate ni Cotejo nga si Daryl ‘K9’ Dabon gidemalas sab human mapilde pinaagi sa unanimous decision ngadto ni Sif  ‘Axe’ Badio sa Unified MMA sa Mandaue City.

Sa undercards, duha ka batan-ong fighters gikan sa Yaw-Yan ArDigma Cebu nga sila si Josh ‘Buffalo’ Ybañez ug Andre Lance Caniga midaog usab batok sa tagsa-tagsa nila ka mga kaatbang.

Si Ybañez mipukan ni John Flores sa Team Talisay, samtang si Caniga midaog pinaagi sa desisyon batok ni Edward Peloni sa Lapu-Lapu City.

Sa bugtong nga mixed martial arts bout, si Steve Murillo impresibong midaog sa iyang debut fight human niya gi-TKO sa second round si Joemel Marilao sa Team Bagwis.

Ang maong amateur Muay Thai kickboxing ug MMA tournament kabahin sa grassroots development program sa Cebu City Sports Commission nga naglakip usab sa boxing, karatedo ug arnis. (BANAT NEWS)